உலகமெங்கும் வசூல் மழையில் சிவாஜி: ரூ.100 கோடியை நெருங்குகிறது

இந்தியாவில் மட்டும் 650 தியேட்டர்களில் திரையிடப்பட்ட 'சிவாஜி' அனைத்து தியேட்டர்களிலும் ஹவுஸ்புல் காட்சிகளாக ஓடிக்கொண்டிருக்கிறது.

தமிழ்நாடு மட்டுமில்லாது ஆந்திரா, கேரளா, கர்நாடகா, மகாராஷ்டிரா ஆகிய மாநிலங்களிலும் இப்படம் வசூல் சாதனை செய்துள்ளது. 'சிவாஜி' படம் மகராஷ்டிராவில் 18 தியேட்டர்களில் நேரடி தமிழ்ப்படமாகவே திரையிடப்பட்டது.

தற்போது இந்தியில் 'ஜூம் பராபர் ஜூம்' என்ற படம் வெற்றிகரமாக ஓடிக்கொண்டிருக்கும் நிலையிலும் நேரடி தமிழ்ப்படமாக திரையிடப்பட்ட சிவாஜிக்கு இப்போதும் இருக்கும் வரவேற்பை பார்த்து வினியோகஸ்தர்களே வியப்படைந்துள்ளனர்.

மேலும் பல மாநிலங்களில் சிவாஜியின் வசூல் வேட்டை தொடர்வதால் புதிய படங்களை திரையிட வினியோகஸ்தர்கள் தயக்கம் காட்டி வருகின்றனர். இப்படம் ஆந்திராவில் மட்டும் ரூ.18 கோடி வசூல் செய்துள்ளது.

இந்தியாவில் மட்டுல்லாது வெளிநாடுகளிலும் 'சிவாஜி' படம் வசூலை குவித்துள்ளது. அமெரிக்காவில் ரூ.4.5 கோடி, இங்கிலாந்தில் ரூ.2.75 கோடி, மலேசியாவில் ரூ.7.8 கோடி என வசூலை அள்ளியது 'சிவாஜி' படம். சிங்கப்பூரில் எந்தவொரு தமிழ்ப்படமும் இதுவரை காணாத வசூலை கண்டுள்ளது எனவும் அங்கிருந்து வரும் தகவல்கள் தெரிவிக்கின்றன.

உலகமெங்கும் திரையிடப்பட்ட 'சிவாஜி' படம் 3 வாரங்களில் மட்டும் ரூ.95 கோடியை வசூலித்துள்ளது என கூறப்படுகிறது.

மாலைமலர்

Distributors confident film will break even before 50-days