.

Saturday, August 4, 2007

3000 ஆண்டுகளுக்கு முந்தைய பாறை ஓவியங்கள்

பழனியை அடுத்துள்ள சத்திரப்பட்டி, புதுக்கோட்டை அருகே உள்ள மேற்கு தொடர்ச்சி மலை அடிவாரத்தில் கோழியூத்து என்னும் சிறிய நீரூற்று உள்ளது. இந்த நீரூற்றுக்கு அருகில் 'அலகல்லு' (அலகல்லு என்றால் அலையின் எழுச்சியைப் போல என்று பொருள்) என்னும் பாறையின் மேல் பழமையான ஓவியங்கள் கண்டறியப்பட்டுள்ளன.

பாறை ஓவியங்கள் 11 மீட்டர் நீளத்திலும், 4.5 மீட்டர் உயரத்திலும் காணப்படுகின்றன இவை அடர்த்தியான வண்ணப்பூச்சு மற்றும் இரு வண்ணப் பூச்சு முறையைப் பயன்படுத்தி வரையப்பட்டுள்ளன. இது 3,000 ஆண்டுகளுக்கு முந்தையது என பாறை ஓவிய வல்லுநர்கள் பவுன்ராஜ், கந்தசாமி ஆகியோர் தெரிவித்துள்ளனர்.

இந்த ஓவியங்களில் கருப்பு, சிவப்பு மற்றும் வெள்ளை இணைந்த கலவை மற்றும் வெள்ளை மட்டும் என மூன்று வண்ணங்கள் பயன்படுத்தப்பட்டுள்ளன. கருப்பு நிறம் தீயை விளக்காக்கி பெறப்படும் கருப்பு, பச்சை நிற மூலிகைச் சாறு, விலங்குகளின் கொழுப்பு ஆகியவற்றிலிருந்து தயாரிக்கப்பட்டுள்ளது. கருப்பு வண்ணம் அதிகமாகக் கிடைப்பது இதுவே முதல்முறை.

இங்கு மனிதன் வேட்டையாடும் பழக்கத்தைக் கொண்டுள்ளதையும், அதற்கு விலங்குகள் மேல் ஏறி ஆயுதத்தைக் கையாள்வதையும் ஓவியமாக வரைந்துள்ளனர். நாய், குதிரை, யானை, மாடு, புலி போன்ற விலங்குகளும், மனிதனின் சடங்குகள், வழிபாட்டு முறைகள், பெரிய உருவத்தைக் கண்டு பயப்படுதல், நடனம், உறங்குதல் போன்ற பல காட்சிகள் வடிவமைக்கப்பட்டுள்ளன.

மேலும், நிலவு, சூரியன் போன்றவையும், இடியுடன் கூடிய மழை, அலங்கார வளைவுகள் போன்றவையும் உள்ளன. இத்தகைய ஓவியங்கள் ஊட்டி அருகே மோயர் பள்ளத்தாக்கில் கண்டறியப்பட்டாலும், இவ்வளவு ஓவியங்கள் மொத்தமாக ஓரிடத்தில் இல்லை. தொல்லியல் நிபுணர்கள் இங்கு ஆய்வு மேற்கொண்டால் மேலும் பல அரிய விஷயங்கள் வெளியாகும்.

தினமணி

2 comments:

வெற்றி said...

சுவாரசியமான தகவல்கள். தெரியப்படுத்தியமைக்கு மிக்க நன்றிகள்.

Madura said...

Interesting!
I wonder if there is a way for tourists to go there?
This sounds like something much earlier than Ajantha, Ellora ...
There they say, that all the art there comes from Kanchi heritage ...
TamilNadu should have had it for a long time then?
Unfortunately, I havent been to chiththannavassal even yet! ... The sad thing about Indian tourism is that things arent glorified or organized as they deserve to be!
hmmm ...

-o❢o-

b r e a k i n g   n e w s...