சென்னை & மதுரை பஸ்களில் ஜி.பி.எஸ் சிஸ்டம் அறிமுகம்

செயற்கைக்கோள் மூலம் பஸ் வந்து கொண்டிருக்கும் இடத்தை பயணிகள் அறிந்து கொள்ள உதவும் ஜி.பி.எஸ் வசதி, சென்னை - மதுரை வழித்தடத்தில் இயக்கப்படும் அரசு பஸ்களில் சோதனை முயற்சியாக அறிமுகப்படுத்தப்படும் என்று போக்குவரத்துத் துறை செயலாளர் திபேந்திரநாத் சாரங்கி தெரிவித்தார்.


இந்த வசதி கொண்ட வாகனங்கள், தற்போது எங்கே வந்து கொண்டிருக்கின்றன என்பதை, பயணிகள் அவர்கள் இருக்கும் இடத்தில் இருந்தே தெரிந்து கொள்ள முடியும். செயற்கைக்கோள் உதவியுடன் இது செயல்படுகிறது. இதன் மூலம் போக்குவரத்தை ஒழுங்குபடுத்த முடியும்.


இந்த வழித்தடங்களில் உள்ள முக்கியமான பஸ் நிறுத்தங்களில் டிஜிட்டல் பலகைகள் வைக்கப்படும். அதன் மூலம் பயணிகள் தாங்கள் எதிர்பார்க்கும் பஸ் எந்த நேரத்தில், எந்த இடத்தில் வந்து கொண்டிருக்கிறது என்பதை தெரிந்து கொள்ள முடியும்.

ஏதேனும் காரணங்களால் பஸ் வருவதற்கு தாமதம் ஏற்பட்டால், அதற்கேற்ப பயணிகள் மாற்று ஏற்பாடுகளை செய்து கொள்ள முடியும். இதனால் அவர்களின் நேரம் வீணாவது தவிர்க்கப்படும்.வழியில் ஏதேனும் அசம்பாவிதம் ஏற்பட்டால், அதுகுறித்து பஸ்சில் இருந்தபடியே கட்டுப்பாட்டு அறைக்கு டிரைவரால் தகவல் தெரிவிக்க முடியும்.