பழைய மகாபலிபுரம் சாலை இனி ராஜிவ்காந்தி சாலை

முன்னாள் பிரதமர் ராஜிவ்காந்தியின் 64வது பிறந்த நாளையொட்டி, முதன்முறையாக தமிழக காங்கிரஸ் கட்சியின் தலைமை அலுவலகமான சத்தியமூர்த்திபவனுக்கு வந்த தமிழக முதல்வர் மு.கருணாநிதி சென்னை பழைய மாமல்லபுரம் சாலைக்கு ராஜிவ் காந்தி பெயர் சூட்டப்படும் என்று அறிவித்துள்ளார்.

முன்னதாக, தமிழக காங்கிரஸ் தலைவர் கிருஷ்ணசாமி முதல்வரை பூங்கொத்து அளித்து வரவேற்றார்

கம்ப்யூட்டர் புரட்சிக்கு வித்திட்டவர் ராஜிவ் காந்தி என்பதை நினைவு கூர்ந்த முதல்வர் இந்த விழாவில் 5 மாணவர்களுக்கு கணினிகளை வழங்கினார். நிகழ்ச்சியில் மத்திய அமைச்சர்கள், காங்கிரஸ் எம்.பி.,க்கள், எம்.எல்.ஏ.,க்கள், மாவட்ட தலைவர்கள் மற்றும் அகில இந்திய காங்கிரஸ் உறுப்பினர்கள் உட்பட முன்னணி தலைவர்கள் கலந்து கொண்டனர்.