காவிரி:அதிமுக கோரிக்கைக்கு கருணாநிதி எதிர்ப்பு

நன்றி MSN தமிழ்
காவிரி நடுவர் மன்ற இறுதித் தீர்ப்பை அரசிழதில் வெளியிட வேண்டும் என்ற அதிமுகவின் கோரிக்கைக்கு முதலமைச்சர் கருணாநிதி எதிர்ப்பு தெரிவித்துள்ளார்.அதிமுகவின் இந்தக் கோரிக்கை, நடுவர் மன்றத்தில் மறு ஆய்வு மனு செய்ய வேண்டும் என்ற அரசின் முடிவுக்கு எதிரானதாக அமைந்துவிடும் என்றும் அவர் கூறியுள்ளார்.மாநிலங்களுக்கு இடையிலான நதிநீர் தாவா சட்டம் 1956 விதி 6(1)ன் கீழ் நடுவர் மன்றத்தின் தீர்ப்பு அரசிதழில் வெளியிடப்பட்டால், அந்த முடிவு சம்பந்தப்பட்ட மாநிலங்களை கட்டுப்படுத்துவதாக அமைந்துவிடும் என்று அவர் சுட்டிக்காட்டியுள்ளார்.

இதுகுறித்து கருணாநிதி இன்று வெளியிட்டுள்ள அறிக்கையில், இந்தப் பிரச்சனை தொடர்பாக அனைத்துக் கட்சி கூட்டத்தில் எடுக்கப்பட்ட ஒருமனதான முடிவுக்கு எதிராக அதிமுகவின் கோரிக்கை அமைந்துள்ளது என்று குற்றம்சாட்டியுள்ளார்.

நடுவர் மன்ற தீர்ப்பு அரசிதழில் வெளியிட வேண்டும் என்று பிரதமரிடம் மனு கொடுப்பது தொடர்பாக அனைத்துக் கட்சி கூட்டத்தில் எந்த முடிவும் எடுக்கப்படவில்லை என்றும் அவர் தெரிவித்துள்ளார்.இந்தப் பிரச்சனையில், மாநிலங்களுக்கு டையிலான நதிநீர் தாவா சட்டம் 1956ன்கீழ் உரிய நடவடிக்கைகளை மாநில அரசு மேற்கொண்டு வருவதாக அவர் கூறியுள்ளார்.

சம்பந்தப்பட்ட மாநிலங்கள் நடுவர் மன்றத்தில் விளக்கம் கோரியோ அல்லது மறு ஆய்வு செய்யக்கோரியோ மேல்முறையீடு செய்யலாம் என்றும், இதுகுறித்த மனுக்களை நடுவர் மன்ற பரிசீலித்து இறுதி முடிவு எடுத்த பிறகே அதனை அரசிதழில் வெளியிட வேண்டும் என்றும் கருணாநிதி விளக்கம் அளித்துள்ளார்.