கேரளாவில் யானைகளுக்கு 'உரிமம்' முறை.

ஊருக்குள் உலா வரும் யானைகள் விவரங்களை பதிவு செய்ய கேரள அரசு முடிவு செய்துள்ளது. இதற்கான முகாம் நேற்று திருவனந்தபுரம் பேரூர்கடையில் தொடங்கியது. இந்த கணக்கெடுப்பில் 14 யானைகள் கலந்து கொண்டன.

யானையின் உயரம், வயது, பெயர், அதன் குணங்கள், யானை சொந்தக்காரரின் பெயர், ஊர் போன்ற குறிப்புகளை அதிகாரிகள் எடுத்து அதை பதிவு செய்து கொண்டனர். மேலும் அதே விவரங்களை மைக்ரோசிப்பில் பதிவு செய்து யானைகளின் காதுக்கு பின்னால் பொருத்தினர்.

ஊருக்குள் உலவும் யானைகள் எத்தனை என்பது இந்த ஆய்வு மூலம் தெரியவரும். மேலும் யானைகளுக்கு மதம் பிடித்தால் அந்த யானை யாருக்கு சொந்தமானவை, மதத்தை அடக்கும் முறை போன்ற விவரங்களை நுணுப்பி மைக்ரோசிப்பை பார்த்தால் அறிந்து கொள்ளலாம். இந்த முறை யானைகளுக்கு உரிமம் வழங்குவதுபோன்றது என அதிகாரிகள் தெரிவித்தனர். .

மாலைமலர்

திருப்பதியில் உடை கட்டுப்பாடு வரும் ?

திருப்பதியில் பெண்களுக்கு இந்திய உடைகளை வற்புறுத்துவது பற்றி கோவில் அதிகாரிகள் ஆலோசித்து வருகிறார்கள். சிலநாட்களுக்கு முன் ஒரு பக்தர் பெண்களின் நவீன உடைகள் எண்ணங்களை சிதற அடிப்பதாக எழுப்பிய புகாரின் பேரில் இந்த நடவடிக்கை சிந்திக்கப் படுகிறது. பெண்கள் புடைவைகளையோ மற்ற இந்திய பாரம்பர்ய உடைகளையோ அணிய வேண்டும் என்று விதிக்கப் படும். கோவில் பணியாளர்கள் ஆண்கள் வேட்டியையும் பெண்கள் சேலையையும் அணிகிறார்கள். உடை கட்டுப்பாட்டை ஒருசிலர் வரவேற்றாலும் பெண்கள் அமைப்பொன்று முதலில் கேரள கோவில்களில் ஆண்கள் சட்டையணிந்து வர கட்டாயப் படுத்தப் படவேண்டும் என்று கூறியுள்ளது.
சென்ற மாதம் குருவாயூர் கோவிலில் சேலை மட்டுமே அனுமதிக்கப் பட்ட நிலையிலிருந்து விலகி சூரிதார் அணிவதும் ஏற்றுக் கொள்ளப் பட்டுள்ளது.

IBNLive.com > Tirupati authorities give women a dressing down : tirupati temple, dress code

ஹிரோஷிமா அணுகுண்டு தாக்குதல்:62ம் நினைவுநாள்

ஹிரோஷிமாவின் 62 நினைவுநாளான இன்று ஜப்பான் அணு ஆயுதங்களை பயன்படுத்துவதில்லை என்று உறுதி எடுத்துள்ளது. அணுஆயுத நாடுகளையும் தங்கள் ஆயுதங்களை விட்டுவிடுமாறு வற்புறுத்தியது. இன்று அமெரிக்க விமானமொன்று 140,000 பேரைக் கொன்ற அதே காலை 8:15 மணிக்கு 45,000 மக்கள் ஒருசேர தங்கள் பிரார்த்தனைகளை கூறி அஞ்சலி செலுத்தினர்.
DNA - World - Japan vows against nukes on Hiroshima anniversary - Daily News & Analysis

நடிகர் சஞ்சய் தத் புனெ சிறைக்கு மாற்றம்

தான் மும்பை சிறையிலேயே வைக்கப் படவேண்டும் என்ற தன் கோரிக்கையை சஞ்சய் தத் விலக்கிக் கொண்டதை யடுத்து அவர் புனெயின் எரவாடா சிறைக்கு மாற்றப் படுவார்.

Dutt to be shifted to Pune's Yerawada jail

காரைக்கால்: சுயாட்சி வேண்டி ஒரு இலட்சம் கையெழுத்து.

காரைக்கால் தொடர்ந்து கல்வி, வேலை வாய்ப்பு, உள்கட்டமைப்பு உள்ளிட்ட அனைத்து துறை களிலும் புறக்கணிக்கப்பட்டு வருவதாகவும், பின்தங்கிய நிலையில் உள்ள காரைக்கால் பகுதி முன்னேற, புதுச் சேரியிலிருந்து பிரிந்து காரைக்காலை தனி யூனியன் பிரதேசமாக்க கோரி பல்வேறு போராட்டங்கள் கரைக்கால் யூனியன் பிரதேச போராட்டக்குழு சார்பில் நடத்தப்பட்டு வந்தது.

இந்நிலையில் மத்திய அரசுக்கு 1 லட்சம் கடிதங்களை அனுப்பிட கையெழுத்து இயக்கம் ஒன்று தொடங்கப்பட்டுள்ளது. காரைக்கால் பகுதி மக்களிடமிருந்து முகவரி மற்றும் கையெழுத்துடன் மத்திய உள்துறை அமைச்சர் சிவராஜ் பாட்டீலுக்கு ஒரு லட்சம் மனுக்களும் அனுப்பி வைக்கப்பட உள்ளது. இந்த இயக்கத்தை தியாகி ரத்தினசாமி முதல் கையெழுத்திட்டு தொடங்கி வைத்தார்.

இந்நிகழ்ச்சியில் காரைக்கால் யூனியன் பிரதேச போராட்டக்குழு நிர்வாகிகளும், பொதுக்குழு மற்றும் செயற்குழு உறுப்பினர்களும் கலந்து கொண்டனர்.


மாலைமலர்

முந்தைய சற்றுமுன்: காரைக்காலுக்கு யூனியன் பிரதேச உரிமை?

அமிலம் ஏற்றிச்சென்ற வாகனத்தில் ஓட்டை: பொதுமக்கள் பீதி

ஹைட்ரோகுளோரிக் அமிலம் ஏற்றிச் சென்ற சரக்குவாகனத்தின்(லாரி) கொள்கலனில் ஓட்டை விழுந்து அதில் இருந்த அமிலம் சாலையில் கொட்டியதனால் அவ்வழியாக சென்ற வாகன ஓட்டிகளுக்கும், பொதுமக்களுக்கும் கண் எரிச்சல் ஏற்பட்டடு பீதியடைந்தனர்.

சென்னை அண்ணாநகர் மேற்கு, பாடி குப்பம் சாலையில் ஜி.கே.எம். என்ற பெயரில் தனியார் இராசயன நிறுவனம் இயங்கி வருகிறது. இந்நிறுவனத்திற்கு மணலியில் இருந்து "ஹைட்ரோ குளோரிக் அமிலம்' ஏற்றிய கொள்கலனுடனுள்ள சரக்குந்து ஒன்று நேற்று மாலை சென்றது. திருமங்கலம் அம்பத்தூர் தொழிற்பேட்டை சாலை வழியாக சென்று பாடி குப்பம் சாலையை அடைந்தது. அப்போது கொள்கலனில் திடீரென்று ஓட்டை விழுந்தது. இதையடுத்து சரக்குவாகனத்தில் இருந்து "அமிலம்' சாலையில் கொட்டத் தொடங்கியது.

இதைப் பார்த்த அப்பகுதியில் இருந்தவர்களும் அவ்வழியாக சென்ற வாகன ஓட்டிகளும் கூச்சல் போட்டனர்.அமிலம் கொட்டியபடியே சென்றதால் அப்பகுதியே புகை மண்டலமாக மாறி நெடி வீசத்துவங்கியது. இருப்பினும் ஓட்டுனர் எங்கும் நிறுத்தாமல் தொடர்ந்து இயக்கினார். இதனால் அப்பகுதியில் பரபரப்பு ஏற்பட்டது. தொடர்ந்து சென்ற இச்சரக்கு வாகனம் இராசயனநிறுவனத்தின் வாசலில் சென்று நின்றது. சிறிது நேரத்தில் அப்பகுதியே அமிலக் குளமாக மாறியது.

இது குறித்து திருமங்கலம் போலீசாருக்கும், ஜெ.ஜெ.நகர் தீயணைப்பு துறையினருக்கும் தகவல் தெரிவிக்கப்பட்டது. தீயணைப்புத் துறையினர் குளமாக தேங்கிய அமிலத்தின்(ஆசிட்) மீது தண்ணீரை பீய்ச்சி அதன் தன்மையை குறைக்க முயன்றனர். ஆனால் தீயணைப்பு வாகனத்தில் இருந்த தண்ணீர் அனைத்தும் தீர்ந்தும் நெடி குறையவில்லை. கடைசியாக அந்நிறுவனத்திற்கு அருகில் உள்ள மணல் விற்பனை கடையில் இருந்து மணல் எடுத்துவரப்பட்டது. அந்த மணல் குளமாக தேங்கியிருந்த அமிலம் மீது கொட்டப்பட்டது. இருப்பினும் பல மணி நேரம் அப்பகுதியில் அமில நெடியும், கண்எரிச்சலும் நீடித்தது.

அப்போது தீடிரென்று பெய்த மழையால் ஓரளவு நெடி தணிந்தது. இது குறித்து இராசயன நிறுவனத்தின் உரிமையாளர்களான கொரட்டூரை சேர்ந்த ராஜேஷ் மற்றும் மதன் ஆகிய இருவரிடமும் காவல்துறையினர் விசாரித்து வருகின்றனர்.

தினமலர்

மதுரைக்கு 286 கோடியில் புதிய இரு திட்டங்கள்

ஜவகர்லால் நேரு தேசிய நகர்புற புதுப்பித்தல் திட்டத்தின் மாநில அளவிலாக 4-வது ஒப்பளிப்பு கூட்டம் அமைச்சர் மு.க.ஸ்டாலின் தலைமையில் நடைபெற்றது. இக்கூட்டத்தில் ரூ.286 கோடி மதிப்பிலான 2 திட்டங்கள் மத்திய அரசுக்கு பரிந்துரைக்க முடிவு செய்யப்பட்டது.

மதுரையில் பாதாளச் சாக் கடைத்திட்டம் தேசிய நதிநீர் பாதுகாப்புத் திட்டத்தின் கீழ் 50 வார்டுகளுக்கு முழு மையாகவும், 22 வார்டு களுக்கு பகுதியாகவும் நிறை வேற்றப்படுகிறது. மேற்படி திட்டத்தில் விடுபட்டுள்ள 22 வார்டுகளுக்கு முழுமையாக பாதாள சாக்கடை திட்டம் அமைக்கவும், நவீன முறையில் சுத்திகரிப்பு நிலையம் அமைக் கவும், மற்றும் பழைய திட்டத்தை மேம்படுத்தவும் ரூ.231.01 கோடிக்கு செயல் படுத்தவும் திட்டம் பரிந்துரைக்கப்பட்டது.

மதுரை மாநகரின் மையப்பகுதியில் அமைந்துள்ள மத்திய காய்கறி அங்காடியை மாட்டு தாவணி பஸ் நிலையம் அருகில் நவீன முறையில் அமைக்க ரூ.55 கோடியில் செயல்படுத்த உள்ள திட்டத்தை பரிந்துரை செய்துள்ளது.

கூட்டத்தில் நிதித்துறை செயலாளர் ஞானதேசிகன், நகராட்சி நிர்வாகம் மற்றும் குடிநீர் வழங்கு துறையின் அரசு செயலாளர் தீனபந்து, டுபிட்கோ நிறுவனத் தலைவர் மற்றும் நிர்வாக இயக்குனர் கௌரிசங்கர், திட்டம் வளர்ச்சி மற்றும் சிறப்பு முயற்சிகள் துறை செயலாளர் சமீர் வியாஸ், வீட்டு வசதி துறை செயலாளர் செல்லமுத்து.நகராட்சி நிர்வாக ஆணை யர் டாக்டர் நிரஞ்சன் மார்டி, சென்னை மாநகராட்சி ஆணையர் ராஜேஷ் லக்கானி மற்றும் அரசு அதிகாரிகள் கலந்து கொண்டனர்.

நன்றி: மாலைமலர்

வங்கதேசம்: ஷேக் ஹசீனா கைது

வங்கதேச முன்னாள் பிரதமரும் அவாமி லீக் கட்சியின் தலைவருமான ஷேக் ஹசீனா வாஜித் அவரது டாக்கா இல்லத்தில் இன்று கைது செய்யப்பட்டார்.

ஹசீனா மீது தொழிலதிபர்களை மிரட்டியது, ஊழலில் ஈடுபட்டது உள்ளிட்ட பல்வேறு புகார்கள் எழுந்த நிலையில் வெளிநாடு சென்று விட்டார். அவர் வங்கதேசம் திரும்பினால் கைது நடவடிக்கை எடுக்கப்படும் என்று ஏற்கனவே அறிவிக்கப்பட்டிருந்தது.

நீதிமன்றத்துக்கு கொண்டு வரப்பட்ட அவரை ஒரு மாத காலம் காவல்துறை காவலில் வைத்திருக்க நீதிமன்றம் கட்டளையிட்டுள்ளது. அவரின் குற்றவிபரம் தெரிவிக்கப்படவில்லை.

ஹரியானா: கலப்பு திருமணத்துக்கு மரணதண்டனை.

ஹரியானா மாநிலம் நுகோ கிராமத்தைச் சேர்ந்தவர் மனோஜ். இவர் தாழ்த்தப்பட்ட வகுப்பை சேர்ந்தவர். இவர் அதே பகுதியில் வசித்த ரிம்பி என்ற உயர் சாதிப் பெண்ணை காதலித்தார். இருவரும் கடந்த 2 ஆண்டுகளாக யாருக்கும் தெரியாமல் ரகசியமாக காதலை வளர்த்து வந்தனர். இருவரது காதலை அறிந்ததும் கிராமத்தில் கடும் எதிர்ப்பு கிளம்பியது.

இதையடுத்து காதல் ஜோடி டெல்லிக்கு ஓட்டம் பிடித்தது.அங்குள்ள கோவில் ஒன்றில் இருவரும் திருமணம் செய்து கொண்டனர். சில நாட்கள் கழித்து பெற்றோரிடம் ஆசி பெறுவதற்காக சொந்த ஊர் திரும்பினார்கள்.காதல் ஜோடி வந்ததை அறிந்ததும் கிராமமக்கள் பொங்கியெழுந்தனர். கிராமப் பஞ்சாயத்து அவசரமாக கூட்டப்பட்டது.

சில மணி நேர காரசார வாக்குவாதத்திற்கு பின் நாட்டாமை தீர்ப்பு கூறினர். அவர் கூறும்போது, "ஊரின் கட்டுப்பாட்டை மீறி கலப்பு மணம் செய்து கொண்ட இரு வருக்கும் மரண தண்டனை விதிக்கிறேன்'' என்றார். இதை கேட்டதும் புதுமணத்தம்பதி அதிர்ச்சியில் உறைந்து
போனார்கள்.அன்று நள்ளிரவே இருவரும் டெல்லிக்கு தப்பிச்சென்று அங்குள்ள ஆஸ்காஸ் போலீஸ் நிலையத்தில் தஞ்சம் புகுந்தனர். இருவரின் உயிருக்கும் நுகோ கிராம மக்களால் எந்நேரமும் ஆபத்து இருப்பதால் அவர்களுக்கு காவல்துறை பாதுகாப்பு போடப்பட்டுள்ளது.

கலப்பு மண ஜோடிக்கு மரண தண்டனை விதித்த நாட்டாமை மற்றும் கிராம மக்கள் மீது நடவடிக்கை எடுக்கும்படி டெல்லி மகளிர் அமைப்புகள் போராட்டம் நடத்தி வருகின்றன.

மாலைமலர்

கி.பி.2025ல் இந்திய மக்கள்தொகை 150 கோடி

வரும் 2025ம் ஆண்டில் இந்திய மக்கள் தொகை 150 கோடியை எட்டும் என்று ஆசிய மற்றும் பசிபிக் நாடுகளுக்கான ஐ.நா பொருளாதார மற்றும் சமூக ஆணையம் மதிப்பிட்டுள்ளது.

கோல்கத்தாவில், நேற்று முன் தினம், 'பேரழிவு பாதிப்பை சந்திக்க, சமூக அடிப்படையில் தயாராக இருத்தல்' என்ற தலைப்பில் நடைபெற்ற கருத்தரங்கில், அமெரிக்க தூதரக அதிகாரி ஹென்றி ஜார்டைன் பங்கேற்றார்.

ஆசிய மற்றும் பசிபிக் நாடுகளுக்கான ஐ.நா., பொருளாதார மற்றும் சமூக ஆணையம் சமீபத்தில் ஆய்வு மேற்கொண்டது. அந்த ஆய்வின்படி, இந்திய மக்கள் தொகை, வரும் 2025ம் ஆண்டில் 150 கோடியாகவும், வரும் 2060ம் ஆண்டில் 170 கோடியாகவும் இருக்கும். அதனால், மக்கள் வசிப்பதற்கு இடநெருக்கடி அதிகமாக இருக்கும். கோல்கட்டாவில் ஏற்கனவே, மக்கள் தொகை அடர்த்தி, ஒரு ச.கி.மீ.,க்கு 24 ஆயிரத்து 760 ஆக இருக்கிறது. அதனால், இந்திய நகரங்களில் எந்த பேரழிவு நிகழ்ந்தாலும், அதன் பாதிப்பு அதிகமாக இருக்கும்.

இந்தியாவில் ஒரு கோடிக்கு மேற்பட்ட மக்கள் தொகையை கொண்ட நகரங்கள் நான்கு உள்ளன. கடந்த 1991ல், 10 லட்சத்திற்கும் மேற்பட்ட மக்கள் தொகையை கொண்ட 23 நகரங்கள் இருந்தன. அந்த எண்ணிக்கை, பத்தாண்டுகளுக்கு பிறகு, இப்போது 35ஆக அதிகரித்துள்ளது.

என்று ஹென்றி ஜார்டைன் அக்கருத்தரங்கில் கருத்து தெரிவித்தார்.

பிலிப்பைன்சில் நில நடுக்கம்.

பிலிப்பைன்ஸ் மத்திய பகுதியில் இன்று காலை லேசான நிலநடுக்கம் ஏற்பட்டது. இதில் அங்குள்ள கட்டிடங்கள் வணிகவளாகங்கள் லேசாக குலுங்கின. இதனால் அங்குள்ள மக்கள் அவசரம், அவசரமாக வீடுகளை விட்டு வெளியேறினார்கள். இந்த நிலநடுக்கம் ரிக்டர் அளவுகோலில் 4.4 ஆக பதிவாகி இருந்தது. பிலிப்பைன்சில் கடந்த 1990ம் ஆண்டு மிகப்பெரிய அளவில் நிலநடுக்கம் ஏற்பட்டு 1000த்திற்க்கும் மேற்பட்டோர் பலியானார்கள் என்பது குறிப்பிடத்தக்கது.

பள்ளிவாசல் ஊழியர்களுக்கு தனி நல வாரியம் அமைக்க அரசுக்கு கோரிக்கை.

பள்ளிவாசல் ஊழியர்களுக்கு தனி நல வாரியம் அமைக்க வேண்டும் என மாநில நிர்வாக குழு கூட்டத்தில் தீர்மானம் நிறைவேற்றப்பட்டது. தமிழ்நாடு பள்ளிவாசல் பணியாளர் சங்க (ஏ.ஐ.டி.யூ.சி.) மாநில நிர்வாகக் குழு கூட்டம் அய்யம்பேட்டை மில்லத் நகர் பள்ளிவாசல் திருமண மண்டபத்தில் நடைபெற்றது. மாநில பொருளாளர் அப்துல்ஹமீது தலைமை வகித்தார். பிலால் லியாகத் அலி வரவேற்றார். ஏ.ஐ.டி.யூ.சி. மாநில துணை தலைவர் சந்திரகுமார் சிறப்புரையாற்றினார். மாநில பொது செயலாளர் அப்துல்காதர் சங்க செயல்பாடுகள் குறித்து விளக்கினார். கூட்டத்தில் தமிழ்நாடு முழுவதும் பள்ளிவாசல்களினல் பணிபுரியும் 30 ஆயிரத்திற்கும் மேற்பட்ட பல்வேறு பணியாளர்களும் பயனடையும் விதத்தில் தனி நலவாரியம் அமைத்து தொழிலாளர் நலத்துறையின் மூலம் செயல்படுத்திட வேண்டும். வக்ப் போர்டு மூலம் குறைந்த எண்ணிக்கையிலான உலமாக்களுக்கு ஓய்வூதியம் வழங்கப்படுகிறது. 60 வயதை கடந்த அனைத்து பள்ளிவாசல் பணியாளர்களுக்கும் வக்ப் போர்டு மூலம் ஓய்வூதியம் வழங்க வேண்டும் என தீர்மானங்கள் நிறைவேற்றப்பட்டன. ரயிலடி பள்ளி பிலால் சாகுல்அமீது நன்றி கூறினார்.

சிறுநீரகம் பாதித்த சிறுமியை ஆற்றில் வீசிய தந்தை.

மிகவும் அதிர்ச்சி தரும் இச்சம்பவம் பற்றி தினமலர் செய்தி வெளியிட்டுள்ளது

சிறுநீரகம் பாதிக்கப்பட்ட ஆறுவயது மகளுக்கு சிகிச்சை அளிக்க முடியாமல் விரக்தி அடைந்த தந்தை, மகளை ஆற்று நீருக்குள் வீசி எறிந்து விட்டு தப்பி ஓடினார். வெள்ளத்தில் தத்தளித்த சிறுமியை மீனவர்கள் காப்பாற்றி மருத்துவமனையில் சேர்ந்தனர்.

உ.பி., ஜான்பூர் மாவட்டத்தில் உள்ள தேவ்காளி என்ற குக்கிராமத்தில் வசிப்பவர் பக்கேரு சோன்கர். இவருக்கு ஆறு குழந்தைகள். கிராமத்தில் காய்கறி வியாபாரம் செய்து பிழைப்பு நடத்தி வருகிறார். இவரது கடைசி குழந்தையான ஆறு வயது சரிதாவிற்கு சிறுநீரக பாதிப்பு இருந்தது. சிகிச்சைக்காக மும்பையில் உள்ள மருத்துவமனையில் கடந்த வாரம் சரிதாவை சேர்த்தனர். சிறுமிக்கு சிகிச்சை அளித்த டாக்டர்கள், "சரிதாவை குணப்படுத்த ரூ.மூன்று லட்சம் செலவாகும். உடனடியாக ஏற்பாடு செய்யுங்கள்' என சோன்கரிடம் கூறினார். ஏற்கனவே கஷ்டப்பட்டு ஜீவனம் நடத்தி வந்த சோன்கர், இதனால் அதிர்ச்சி அடைந்தார். "யாரிடம் போய் பணம் கேட்பது, நமக்கு உதவ ஒருவரும் இல்லையே' என விரக்தி அடைந்த அவர், சரிதாவை அழைத்துக் கொண்டு நேற்று முன்தினம் ஜான்பூர் திரும்பினார். சரிதாவுடன் அங்கு ஓடும் கோமதி ஆற்றுக்கு சென்றார். ஆற்றின் குறுக்கே கட்டப்பட்டுள்ள பாலத்தில் இருந்து, கரை புரண்டு ஓடும் ஆற்று நீருக்குள் சரிதாவை வீசி எறிந்து விட்டு திரும்பி பார்க்காமல் நடையை கட்டினார்.

அருகில் மீன் பிடித்துக் கொண்டிருந்த மீனவர்கள், ஒரு சிறுமி நீருக்குள் தத்தளித்துக் கொண்டு இருப்பதையும், அந்த சிறுமி, "அப்பா காப்பாற்றுங்கள், அப்பா கப்பாற்றுங்கள்' என உதவிக் குரல் எழுப்புவதையும் கண்டனர். உடனடியாக சரிதாவை தண்ணீரில் இருந்து மீட்டு, அருகில் உள்ள மருத்துவமனையில் சேர்த்தனர். அங்கு சரிதாவிற்கு சிகிச்சை அளிக்கப்பட்டு வருகிறது.இதுபற்றி ஜான்பூர் மாவட்ட போலீஸ் அதிகாரி யோகேந்திர சுக்லா கூறுகையில்,""சரிதாவை ஆற்றுக்குள் வீசிய சோன்கரை தேடி வருகிறோம். அவர் மீது நடவடிக்கை எடுக்கப்படும். ஆனால், தற்போது எங்கள் கவலை எல்லாம் சரிதாவைப் பற்றித் தான். அந்த குழந்தையை எப்படியாவது காப்பற்ற வேண்டும்,''என்றார்.நினைவு திரும்பிய சரிதா, ""எங்க அப்பா ஏன் என்னையை ஆற்றுக்குள் துõக்கிப் போட்டார்? உங்களுக்கு தெரியுமா?'' என கள்ளம் கபடம் அறியாத மழலை மொழியில் கேட்டது, அங்கிருந்த டாக்டர் மற்றும் போலீஸ் அதிகாரிகளின் மனதை உலுக்கி விட்டது.

ஜோதிபாசு 94ஆம் பிறந்தநாள்

இன்று கம்யூனிஸ்ட் தலைவர் ஜோதிபாசுவின் 94வது பிறந்தநாள். வழமையாக பொதுவுடமை தோழர்கள் தங்கள் பிறந்தநாளை சிறப்பாக கொண்டாடுவது இல்லை எனினும் தனது சீடரும் மாநில போக்குவரத்து மற்றும் விளையாட்டுத் துறை அமைச்சருமான சுபாஷ் சக்ரவர்த்தியின் வேண்டுகோளை தட்டமுடியாது இந்த கொண்டாட்டத்தில் கலந்து கொள்வதாகவும் கூறினார். " இந்த இனிய நேரத்தில் எதிர்கட்சிக்கும் எனது வாழ்த்துக்களைத் தெரிவிக்கிறேன். அவர்கள் மேற்கு வங்கம் தொழில்மயமாவதை ஆதரிக்க வேண்டும், நாங்கள் மக்களுக்கு உணமையில் நல்லதையே செய்கிறோம்" என்று கூறினார். விவசாயத்தில் முன்னணி வகிக்கிறோம்; பஞ்சாயத்து ஆட்சியில் முதன்மையாக இருக்கிறோம். இனி நான்காவதாக இருக்கும் தொழிற்துறையிலும் முன்னணிநிலையை அடைய வேண்டும். சிறுதொழில்களும் நடுத்தர தொழில்களும் வளர விரும்புகிறோம். அதற்கு எதிர்கட்சிகள் உதவ வேண்டும் என வேண்டுகோள் விடுத்தார்.
அவரது வாழ்க்கைக் குறிப்பும் மேல் விவரங்களுக்கும்...India eNews -

லண்டன் கார் குண்டு சம்பவம்:குடும்பத்தினரிடம் போலீசார் விசாரணை.

லண்டன் கார் குண்டு சம்பவம் தொடர்பாக பெங்களூரை சேர்ந்த சபீல் அகமது என்ற டாக்டர் மற்றும் அவரது சகோதரர் கபில் அகமது ஆகியோர் ஆஸ்திரேலியாவில் கைது செய்யப்பட்டனர். அவர்களிடம் ஆஸ்திரேலிய போலீசார் தொடர்ந்து விசாரணை நடத்தி வருகிறார்கள். இந்நிலையில் பெங்களூரில் உள்ள டாக்டரின் குடும்பத்தினரிடம் பெங்களூர் போலீசார் இன்று காலை 2 மணி நேரம் விசாரணை நடத்தினார்கள். ஆனால் விசாரணை விவரங்களை தெரிவிக்க போலீசார் மறுத்து விட்டனர்.

உயிருடன் பாம்பை விழுங்குவேன் :ஒரிசாகாரர்

ஒரிசாவின் அங்குல் மாவட்ட படாபுத்தபங்கா கிராமத்தில் வசிக்கும் சுதாரி நாயக் தான் பாம்புகளை உயிருடன் அப்படியே சாப்பிடுவதாகக் கூறுகிறார். பாம்புகளுடன் பல வித்தைகள் காண்பிக்கும் இவரைப்பற்றி மேலும் அறிய - Orissa man eats live snake's meat - Daily News & Analysis

மதுரை கோவையில் பாஸ்போர்ட் அலுவலகம்.

மதுரை கோவையில் ரூ.50 லட்சம் செலவில் புதிய பாஸ்போர்ட் அலுவலகம் அமைக்கப்படுகிறது. செப்டம்பர் மாத இறுதியிலிருந்து இந்த அலுவலகம் இயங்கும். இது குறித்து திருச்சி மண்டல பாஸ்போர்ட் அதிகாரி பாலச்சந்திரன் கூறியதாவது இந்தியாவில் மொத்தம் 31 பாஸ்போர்ட் அலுவலகங்கள் உள்ளன. தமிழ்நாட்டில் சென்னை, திருச்சியில் மட்டும் இருக்கின்றன. தமிழகத்தில் மேலும் 2 அலுவலகங்கள் மதுரை, கோவையில் அமைய உள்ளன. இதில் திருச்சி பாஸ்போர்ட் அலுவலக கட்டுப்பாட்டில் மதுரையில் புதிய அலுவலகம் அமைவதற்கான பணிகள் வேகமாக நடந்து வருகின்றன. இந்த கட்டிடம் மதுரை கலெக்டர் அலுவலக வளாகத்திற்குள் அமைக்கப்படும். இதற்கான பூமி பூஜை ஏற்கனவே போடப்பட்டு விட்டது. அலுவலகம் முழுவதும் ஏ.சி. வசதி செய்யப்பட உள்ளது. தென்னிந்தியாவிலேயே முதன்முதலில் குளிர் பதன வசதியுடன் அமைக்கப்பட போகும் அலுவலகம் இதுவே ஆகும். மதுரை அலுவலகம் 8 மாவட்டங்களை கட்டுப்படுத்தி செயல்படும் என்றார்.

பாக்கிஸ்தான்: 50 இந்திய மீனவர்கள் விடுவிப்பு.

இந்தியா-பாக்கிஸ்தான் பேச்சுவார்த்தையில் கண்ட உடன்பாட்டின் படி இந்தியாவில் உள்ள 43 பாகிஸ்தான் மீனவர்களை இந்தியா விடுதலை செய்தது.

இதை அடுத்து பாக்கிஸ்தான் ஜெயிலில் இருந்து 50 இந்திய மீனவர்களை பாக்கிஸ்தான் அரசு விடுதலை செய்தது. லாண்டி ஜெயிலில் இருந்து விடுதலையான அந்த இந்திய மீனவர்கள் பஸ்மூலம் லாகூர் நகருக்கு கொண்டு செல்லப்பட்டனர். அங்கிருந்து இன்று வாகா எல்லைக்கு கொண்டு வரப்பட்டு இன்று இந்திய அதிகாரிகளிடம் ஒப்படைக்கப்படுகிறார்கள்.

கடந்த 2005-ம் ஆண்டு முதல் இவர்கள் பாக்கிஸ்தான் சிறைகளில் அடைக்கப்பட்டு இருந்தனர். இன்னும் 400 இந்திய மீனவர்கள் பாக்கிஸ்தானின் பல்வேறு ஜெயில்களில் அடைக்கப்பட்டு இருப்பது குறிப்பிடத்தக்கது.

இந்தியா அணிசேரா நாடுகள் குழுமத்திற்கு தொடர்ந்து ஆதரவளிக்கும்

உலகில் இரு அணிகள் இல்லாத, மறைமுக யுத்தம் (Cold war) இல்லாத நிலையில் அணிசேரா நாடுகள் குழுமத்தின் அவசியம் என்னவென்றும் இந்தியா இந்த குழுமத்தை கைவிட வேண்டும் என்றும் அமெரிக்க வெளியுறவு செயலர் காண்டெலசா ரைஸ் கூறியதற்கு எதிர்வினையாக இந்திய வெளியுறவு அமைச்சகம் விடுத்த அறிக்கையில் இந்தியா ஒருபோதும் அணிசேரா நாடுகள் இயக்கத்திற்கு கொடுக்கும் ஆதரவு உறுதியானதும் நிலையானதுமாகும் என்று குறிப்பிட்டுள்ளது. இனவெறி காலனியாதிக்கத்தை முடிவுக்கு கொண்டுவர மிகவும் உதவிய இந்த இயக்கம் இன்றும் உலகளாவிய ஜனநாயகம் தழைக்க அவசியமானது என்றும் அந்த அறிக்கை குறிப்பிட்டுள்ளது.

NDTV.com: India firm on NAM commitment

நடிகை விஜயசாந்தி மீது வருமான வரித்துறை வழக்கு

தெலுங்கிலும், தமிழிலும் பிரபலமாக இருந்த நடிகை விஜயசாந்தி. நடிப்பு வாய்ப்பு மங்கத் தொடங்கியபோது தலி தெலுங்கானா என்ற அரசியல் கட்சியைத் தொடங்கினார் விஜயசாந்தி.

2002-03, 2003-04ம் ஆண்டுகளுக்குரிய வருமான வரிக் கணக்கை விஜயசாந்தி தாக்கல் செய்யவில்லை. இதையடுத்து சில மாதங்களுக்கு முன்பு சென்னை எழும்பூர் பொருளாதார குற்றத் தடுப்பு நீதிமன்றத்தில் வருமான வரித்துறை விஜயசாந்தி மீது வழக்கு தொடர்ந்தது.

இதுதொடர்பாக நேரில் ஆஜராகி விளக்கம் அளிக்குமாறு நீதிமன்றம் பலமுறை நோட்டீஸ் அனுப்பியது. இருப்பினும் அவருக்கு உடல் நலம் சரியில்லை என்று கூறி விஜயசாந்தி நேரில் ஆஜராகவில்லை.

நேற்று மீண்டும் வழக்கு விசாரணைக்கு வந்தது. அப்போது நீதிபதி பிரேம்குமார் முன்பு ஆஜரான விஜயசாந்தியின் வக்கீல் விஜயசாந்தியால் நேரில் வர முடியவில்லை என்று சில காரணங்களைக் கூறினார்.

விஜயசாந்தி. இப்போது தனி தெலுங்கானா மாநிலத்திற்கான போராட்டங்களில் தீவிரமாக ஈடுபட்டுள்ளார்.

அதை ஏற்க மறுத்த நீதிபதி, வருகிற ஆகஸ்ட் 3ம் தேதி கண்டிப்பாக விஜயசாந்தி ஆஜராக வேண்டும் என்று கூறி விசாரணையை அன்றைய தினத்திற்கே ஒத்திவைத்தார்.